nahin ab rok pa.egi fasil-e-shahr paani ko
baha.e ja rahi hai raushni ki lahr paani ko
mujhe bhi surḳh karti hai ye mash.al meri ankhon ki
ki jaise sabz karta hai ziya ka zahr paani ko
kisi be-nam sayyare pe ab bhi abr chhaya hai
tarasta hai ka.i din se agarche dahr paani ko
bahut itra rahi hai mauj-e-sahra apne hone par
ravan rakhti ho jaise aaj bhi ye nahr paani ko
nikalna chahta hai qaid se jaise mashiyyat ki
pasand aaya nahin hai asmani qahr paani ko
use vo raakh karne ke liye tayyar hai ‘sajid’
muqayyad hi na rakkhega faqat ye shahr paani ko
Leave a Reply