la-makan naam hai ujḌe hue virane ka
hu ke aalam men hai maskan tire divane ka
shauq-e-rusva koi dekhe tire divane ka
ḳhud vo aghaz bana hai kisi afsane ka
jam-e-dil bada-e-ulfat se bhara rahta hai
vaah kya zarf hai TuuTe hue paimane ka
dastan ishq ki hai puuri suna.enge kalim
qissa tuur to ik baab hai afsane ka
sham.a ne bazm men jal jal ke jalaya aḳhir
aah kya hashr hua ishq men parvane ka
mustatar qulqul-e-mina men hai raz-e-masti
bhed kis tarah khule phir tire mastane ka
hashr men dekh ke majma.a lab-e-kausar saaqi
phir gaya ankhon men naqsha tire maiḳhane ka
milte hi saghar-o-shisha se chhalak jaata hai
ye bhi kya daur hai saaqi tire paimane ka
kya qayamat hai ki mahshar men bhi pursish na hui
hashr ab dekhiye kya ho tire divane ka
saf.ha dil mira a.ina-e-ramz-e-tauhid
raz-e-kaunain ḳhulasa mire afsane ka
‘shauq’ ab kis liye fikr-e-mai-o-mai-ḳhana hai
bharne vaala to koi aur hai paimane ka
Leave a Reply