jo hai chashma use sarab karo
shahr-e-tishna men inqalab karo
muskurane ka fan to ba.ad ka hai
pahle saa.at ka intiḳhab karo
ab ke ta.abir mas.ala na rahe
ye jo duniya hai is ko ḳhvab karo
aur pakne do ishq ki miTTi
paar ujlat men mat chanab karo
ahd-e-nau ke ajab taqaze hain
jo hai ḳhushbu use gulab karo
yuun ḳhushi ki havas na ja.egi
ek ik gham ko be-naqab karo
harsingaron se bolti hai zamin
ab ki rut men mujhe kitab karo
pahle puchho saval apne ta.iin
phir ḳhala se talab javab karo
Leave a Reply