Asad Rizvi
hansi un ki gul aur chaman jante hain
ye lab muskurane ka fan jante hain
na.e log ho tum na.i baat jaano
mira haal ahal-e-kuhan jante hain
mubarak ho tum ko hisar-e-ḳhamoshi
zaban vaale tarz-e-suḳhan jante hain
lahu ke jo qatre baha.e hain main ne
mire jism ke pairahan jante hain
tum hi sahab-e-saltanat to nahin ho
hukumat ke ham bhi chalan jante hain
shab-o-roz mere guzarte hain kaise
‘asad’ ye to ahl-e-vatan jante hain
Leave a Reply