Muntazir Firozabadi
ḳhush bahut tha ek lamha shadmani dekh kar
gham hua mujh ko yuun gham ki tarjumani dekh kar
jo guzarti ja rahi hai naam us ka umr hai
zindagi hairan hai is ki ravani dekh kar
haa.e is sayyad ne divar ranva di ajiib
uḌ rahe hain saare panchhi asmani dekh kar
jugnuon ne aaj davat par bulaya chand ko
chand shab bhar TimTimaya mezbani dekh kar
ankhen meri thiin labalab gard ka pahra tha yaan
vo ye samjha dhoka hai sahra men paani dekh kar
kya maza gar ishq men thoḌi bahut duuri na ho
us ne ḳhud se ye kaha meri nishani dekh kar
ek to dil sha.irana aur phir majruh bhi
chain mujh ko aa.ega bas baghbani dekh kar
muTThiyon men ḳhaak le kar aa ga.e hain sab ke sab
kar do mujh ko dafn meri be-makani dekh kar
vo mohabbat ke ma.ani bas batata hi raha
ishq phir jaata raha dasht-e-ma.ani dekh kar
raaz thoḌe aao kholen us ḳhuda ke muntazir
is zamin par asman ki hukmarani dekh kar
Leave a Reply