ham zindagi-shanas the sab se juda rahe
basti men haul aaya to jangal men ja rahe
kamre men mere dhuup ka aana ba-vaqt-e-sub.h
ankhon men kaash ek hi manzar basa rahe
phir aaj mere dard ne mujh ko mana liya
koi kisi aziiz se kab tak ḳhafa rahe
kab tak kisi paḌav pe vahshat kare qayam
kab tak kisi ke hijr ka saaya ghana rahe
baaba ye mujh haqir ko itni baḌi dua
tu baat ka dhani hai tira qad siva rahe
‘shahpar’ sada-e-vaqt se kar lo musalahat
mahrumiyon ke dar pe koi kyuun paḌa rahe
Leave a Reply