Sahar Mahmood
andhere se ziyada raushni taklif deti hai
zamane ko miri zinda-dili taklif deti hai
bahut achchha tha jab na-ashna tha husn duniya se
mujhe ab hosh-mandi agahi taklif deti hai
vo aksar chheḌ dete hain mire derina zaḳhmon ko
na jaane kyuun unhen meri ḳhushi taklif deti hai
jo apne sinon men dil ki ba-ja-e-sang rakhte hain
unhen ham ahl-e-dil ki sarḳhushi taklif deti hai
ho takmil-e-havas jis dosti ka muntaha ai dil
mujhe vo rasm-o-rah-e-ashiqi taklif deti hai
ḳhuda ke fazl se mujh ko sabhi kuchh mil gaya lekin
mujhe is bazm men un ki kami taklif deti hai
‘sahar’ vabasta meri sha.iri hai un ki yadon se
kabhi pur-kaif hoti hai kabhi taklif deti hai
Leave a Reply