kahta rahe zamana gunahgar zindagi
kuchh log ji rahe hain mazedar zindagi
kirdar apna apna nibhate hain sab yahan
samjho na tum kisi ki hai be-kar zindagi
ik vaqfa-e-ajal bhi to aata hai darmiyan
chalti nahin kisi ki lagatar zindagi
aage nikal chuke the ham apne vajud se
phir bhi hui na kam tiri raftar zindagi
raste ka.i hasin nikalte jahan se the
laa.i thi aise moḌ pe ik baar zindagi
hai zindagi se shikva unhen bhi bahut ‘farogh’
hisse men jin ke i hai gulzar zindagi
Leave a Reply