mirza-shauq-lakhnavi

Kahne Mein Nahin Hain Wo Hamare Kai Din Se

kahne men nahin hain vo hamare kai din se

phirte hain unhen ghair ubhare kai din se

jalve nahin dekhe jo tumhare kai din se

andhere hain nazdik hamare kai din se

be-subh nikalta nahin vo raat ko ghar se

khurshid ke andaz hain saare kai din se

ham jaan gae aankh milao na milao

bigde hue tevar hain tumhare kai din se

kis chak-e-gareban ka kiya aap ne matam

kapde bhi nahin tum ne utare kai din se

divana hai saudai hai farmate hain aksar

in namon se jaate hain pukare kai din se

dil phans gaya hai aap ki zulfon men hamara

hain banda-e-be-dam tumhare kai din se

munh gaal pe rakh dete hain sote men chimat kar

kuchh kuchh to haya kam hui baare kai din se

mehndi bhi hai missi bhi hai lakha bhi hai lab par

kuchh rang hain be-rang tumhare kai din se

Dar se tire kakul ke nahin chalte hain raste

dam band hain is saanp ke maare kai din se

akhir miri aahon ne asar apna dikhaya

ghabrae hue phirte ho pyare kai din se

kis kushta-e-kakul ka rakha sog miri jaan

gesu nahin kyuun tum ne sanvare kai din se

pamal karoge kisi varafta ko apne

atkheliyan hain chaal men pyare kai din se

ik shab mire ghar aan ke mehman rahe the

aae nahin is sharm ke maare kai din se

phir ‘shauq’ se kya us but-e-ayyar se bigdi

hote nahin baham jo ishare kai din se

More Poems

Leave a Comment