kahin bhi saaya nahin kis taraf chale koi
daraḳht kaaT gaya hai hare-bhare koi
ajiib rut hai zaban za.iqe se hai mahrum
tamam shahr hi chup ho to kya kare koi
hamare shahr men hai vo gurez ka aalam
charag bhi na jala.e charag se koi
ye zindagi hai safar munjamid samundar ka
vahin pe shaq ho zamin jis jagah ruke koi
palaT kar aa nahin sakte ga.e hue lamhe
tamam umr bhi ab jagta rahe koi
misal-e-aks muqayyad hisar-e-zat men huun
vo mauj huun jise rasta na mil sake koi
phir is ke ba.ad bikhar ja.un ret ki surat
bas ek baar mujhe TuuT kar mile koi
huzur-e-husn ye dil kasa-e-gada.i hai
huun vo faqir jise bhiik bhi na de koi
saval us ne bhi koi nahin kiya ‘shahzad’
javab ban na paḌe jis ke samne koi
Leave a Reply