asrar-e-ishq hai dil-e-muztar liye hue
qatra hai be-qarar samundar liye hue
ashob-e-dahr o fitna-e-mahshar liye hue
pahlu men ya.ani ho dil-e-muztar liye hue
mauj-e-nashim-e-sub.h ke qurban ja.iye
aa.i hai bu-e-zulf-e-mo.ambar liye hue
kya mastiyan chaman men hain josh-e-bahar se
har shaḳh-e-gul hai haath men saghar liye hue
qatil nigah-e-yas ki zad se na bach saka
ḳhanjar the ham bhi ik tah-e-ḳhanjar liye hue
ḳhira kiye hai chashm-e-haqiqat-shanas bhi
har zarra ek mehr-e-munavvar liye hue
pahli nazar bhi aap ki uff kis bala ki thi
ham aaj tak vo choT hain dil par liye hue
tasvir hai khinchi hui naz-o-niyaz ki
main sar jhuka.e aur vo ḳhanjar liye hue
sahba-e-tund-o-tez ko saaqi sambhalna
uchhle kahin na shisha-o-saghar liye hue
main kya kahun kahan hai mohabbat kahan nahin
rag rag men dauḌi phirti hai nashtar liye hue
naam un ka aa gaya kahin hangam-e-baz-purs
ham the ki uḌ ga.e saf-e-mehshar liye hue
‘asghar’ harim-e-ishq men hasti hi jurm hai
rakhna kabhi na paanv yahan sar liye hue
Leave a Reply