kahan vo sim-tanan hain kahan vo gul-badnan
aziz-az-dil-o-jan hai hadis-e-lala-ruḳhan
ye ham se puchho jalal-o-jamal kya shai hai
hamare gird raha hai hujum-e-mah-vashan
miri nigah ko hai diid ki kahan fursat
hain yuun to jalve hi jalve faza men raqs-kunan
sukun hai kar-gah-e-zist men kahan yaaro
kashan-kashan liye phirti hai gardish-e-dauran
yahan to saans bhi lene men ehtiyat hai shart
ba-qaul ‘mir’ ye hai kar-gah-e-gah-shisha-garan
‘habab’ apne vatan se to duur huun lekin
nigah men hain sabhi dostan-e-zinda-dilan
Leave a Reply