ham to yuun khush the ki ik taar gareban men hai
kya khabar thi ki bahar is ke bhi arman men hai
ek zarb aur bhi ai zindagi-e-tesha-ba-dast
saans lene ki sakat ab bhi miri jaan men hai
main tujhe kho ke bhi zinda huun ye dekha tu ne
kis qadar hausla haare hue insan men hai
fasle qurb ke shoalon ko hava dete hain
men tire shahr se duur aur tu mire dhyan men hai
sar-e-divar farozan hai abhi ek charagh
ai nasim-e-sahari kuchh tire imkan men hai
dil dhadakne ki sada aati hai gahe-gahe
jaise ab bhi tiri avaz mire kaan men hai
khilqat-e-shahr ke har zulm ke ba-vasf ‘faraz’
haae vo haath ki apne hi gareban men hai