Kahan Ki Gunj Dil-E-Na-Tawan Mein Rahti Hai

kahan ki guunj dil-e-na-tavan men rahti hai

ki tharthari si ajab jism-o-jan men rahti hai

qadam qadam pe vahi chashm o lab vahi gesu

tamam umr nazar imtihan men rahti hai

maza to ye hai ki vo khud to hai nae ghar men

aur us ki yaad purane makan men rahti hai

pata to fasl-e-gul-o-lala ka nahin malum

suna hai qurb-o-javar-e-khizan men rahti hai

main kitna vahm karun lekin ik shua-e-yaqin

kahin navah-e-dil-e-bad-guman men rahti hai

hazar jaan khapata rahun magar phir bhi

kami si kuchh mire tarz-e-bayan men rahti hai

More Poems

Leave a Comment