Jahangeer Nayab
kaha hai main ne ye kab mahtab mil jaa.e
mujhe to bas miri ankhon ka ḳhvab mil jaa.e
main is gali se yahi soch kar guzarta huun
kitab-e-zist ka gum-gashta baab mil jaa.e
sabhi gunah main hans kar qubul kar lunga
faqih-e-shahr ka tujh ko ḳhitab mil jaa.e
mile faqat mire hisse ki raushni mujh ko
talab kahan hai koi aftab mil jaa.e
ba-qadr-e-zarf hi garche saval hai mera
ajab nahin ki mujhe be-hisab mil jaa.e
main bahr-e-fikr men huun gharq is liye ‘nayab’
guhar mujhe bhi koi zer-e-ab mil jaa.e
Leave a Reply