kabhi ye zindagi achchhi-bhali bhi guzri thi
hamare honTon se ya.ani hansi bhi guzri thi
abhi sukut hai sehra hai dhuul uḌti hai
inhin do ankhon se pahle nadi bhi guzri thi
tamam lafzon ki sargoshiyan sunin shab bhar
sada.en deti hui sha.iri bhi guzri thi
har ek raah men har lahza DhunDhta huun main
yahan se ishq ki sankri gali bhi guzri thi
mujhe hi baat nahin karni thi koi varna
mire qarib se kal zindagi bhi guzri thi
jahan pe zindagi baiThi hai paanv phaila kar
usi gali se kabhi ḳhud-kushi bhi guzri thi
abhi to sirf guzarti hai mujh pe tanha.i
kabhi mujhi se tumhari kami bhi guzri thi
Leave a Reply