kabhi yaqin se hui aur kabhi guman se hui
tire huzur rasa.i kahan kahan se hui
falak na mah-e-munavvar na kahkashan se hui
khuli jab aankh mulaqat ḳhak-dan se hui
na falsafi na mufakkir na nukta-dan se hui
ada jo baat hamesha tiri zaban se hui
khuli na mujh pe bhi divangi miri barson
mire junun ki shohrat tire bayan se hui
jo tere naam se mansub mera naam hua
to shahr bhar ko adavat bhi meri jaan se hui
suna ke sab ko akela hi ro raha tha main
kisi ki aankh na tar meri dastan se hui
jinhen tha Dubna un ko bhi de diya rasta
kabhi kabhi ye ḳhata bahr-e-be-karan se hui
‘faragh’ haath se kya daman-e-ḳhirad chhuTa
ki sar pe sang ki barish jahan-tahan se hui
Leave a Reply