ahbab ke qarib mohabbat se baiThiye
izzat jo mil ga.i hai to izzat se baiThiye
un ki gali men jaana zaruri nahin magar
jaana jo ho gaya to sharafat se baiThiye
anjam-e-ishq Thiik hi hoga janab-e-shaiḳh
fursat se aa ga.e ho to fursat se baiThiye
sahil se har ḳhushi ka nazara fuzul hai
tufan-e-gham men rah ke bhi himmat se baiThiye
nafrat ki baat karna gunah-e-azim hai
mahbub ke qarib to chahat se baiThiye
rah rah ke gir rahi hain nigahon ki bijliyan
aa kar hamare paas mohabbat se baiThiye
‘maikash’ ko piine dijiye zulfon ki chhanv men
kuchh der us ke paas mohabbat se baiThiye
Leave a Reply