kabhi tum ne bhi ye socha ki ham fariyad kya karte
tumhara dil dukha kar apne dil ko shaad kya karte
miri barbadiyon par hansne vaalo ye to samjha do
jo mil jaata tumhin ko ye dil-e-barbad kya karte
nigah-e-yas men jab nala-e-ḳhamosh pinhan hai
to phir honThon ko ham sharminda-e-faryad kya karte
dam-e-aḳhir bhi ai dil ḳhud-farebi hichkiyan kaisi
jo danista bhula baiThe vo tujh ko yaad kya karte
mujhe dekha to har ik ne unhen jallad Thahraya
unhen dekha to bole ye bhala bedad kya karte
zamana janta hai hazrat-e-‘naḳhshab’ ki ḳhud-dari
ḳhilaf-e-aql hai vo arzu-e-dad kya karte
Leave a Reply