darun-e-mai-kada kis darja hasrat-rez hai saaqi
jo gard-alud kursi hai to TuuTi mez hai saaqi
na kyon hur-e-jinan ke zikr se mahzuz ho vaa.iz
ye us ke tausan-e-dil ke liye mahmez hai saaqi
mire auqat-e-girya Time Table par muqarrar hain
ye banda ishq ke baare men bhi angrez hai saaqi
jala kar rakh diya hai us ne shahr-e-arzu mera
tira darban asli varis-e-changez hai saaqi
zara is unghte mai-kash ki ik bharpur chuTki le
gulabi naḳhun-e-tadbir tera tez hai saaqi
vo mere do na.e paise hi apne purse men rakh le
ki us ke sabr ka paimana ab labrez hai saaqi
raqib-e-ru-siyah sar phoḌ lega kohkan ban kar
tira shauhar ḳhuda ke fazl se parvez hai saaqi
mira hissa mujhe chhup kar hi mil jaa.e to behtar hai
gada-e-mai-kada ghairon se kam-amez hai saaqi
Leave a Reply