Anwar Shadani
kabhi to pyaar se lega vo naam apna bhi
qubul hoga kisi din salam apna bhi
kabhi to ham bhi rag-e-gul se kaaT den patthar
jahan men kuchh to ho mash.hur naam apna bhi
koi to jhankega meri taraf dariche se
kisi nigah men hoga maqam apna bhi
is aarzu men sar-e-rah baiTh jaata huun
vahan se la.ega qasid payam apna bhi
vo jis ke dil men jagah hai musafiron ke liye
ye kya zarur kare intizam apna bhi
machi hain shahr men jis ke ḳhulus ki dhumen
vo shaḳhs kuchh to kare intizam apna bhi
mujhe yaqin hai saaqi ke lutf par ‘anvar’
sharab-e-husn se bhar dega jaam apna bhi
Leave a Reply