Hum Apne Dil Ki dhaDkan Mein Ek Tamanna Lae Hain

Jazib Quraishi

ham apne dil ki dhaḌkan men ek tamanna laa.e hain

tujh se pyaar ki baten karne duur kahin se aa.e hain

apni ankhen rahguzar hain apna chehra patthar hai

tere va.adon ne bhi mujh ko kya kya ḳhvab dikha.e hain

tere anchal ki chhanv se shahr-e-junun ki dhuup talak

ḳhushbu ban kar bikhre ham ghuncha ban kar murjha.e hain

koi ujala tha jo hamare jism-o-jan se guzra hai

kis ḳhurshed ne andhe ghar men apne aks uḌaa.e hain

taaza dhuup men jhiil kinare jab se tujh ko dekha hai

‘jazib’ ne ujle ujle rangon ke ḳhvab bichha.e hain