kabhi to dosto apne vatan ki baat karen
kabhi to chak-e-dil-o-pairahan ki baat karen
ḳhirad ki bazm men divane-pan ki baat karen
hikayaton men kisi sim-tan ki baat karen
gulon ke samne kya fikr-o-fan ki baat karen
ye saada log hain un se chaman ki baat karen
ḳhayal-e-yar salamat hazar bazm-e-tarab
ghazal ke naam pe gul-pairahan ki baat karen
masham-e-jan men vo gesu mahakte jaate hain
kisi ḳhutan ki na mushk-e-ḳhutan ki baat karen
nigah-e-fitna hai ek ik ada qayamat hai
vo laakh ban ke baḌe bholpan ki baat karen
bhali si baat azizon pe baar hoti hai
dayar-e-ghair men kaise vatan ki baat karen
shanasa chehre yahan ajnabi se lagte hain
hon ahl-e-zauq to ahl-e-suḳhan ki baat karen
jahan pe qatl ho urdu zaban nafasat se
chalo kuchh aaj usi anjuman ki baat karen
Leave a Reply