kabhi kisi ko jo dekha kisi ki banhon men
tujhi ko yaad kiya dil ne sard aahon men
isi ummid pe duniya ko ham ne chhoḌ diya
sukun dil ko milega tiri panahon men
bahut hasin tha bachpan ka vo zamana bhi
koi hasin kali thi miri nigahon men
kiya tha tu ne bhi mujh se nibah ka va.ada
ye chand aur sitare bhi hain gavahon men
bahut dinon se chhupa hai vo chand jaane kahan
bahut dinon se andhera hai dil ki rahon men
azab-e-hijr na de ai ḳhuda-e-husn mujhe
miri vafa ko bhi shamil na kar gunahon men
Leave a Reply