Kabhi KHwabon Mein Mila Wo to KHayalon Mein Kabhi

kabhī ḳhvāboñ meñ milā vo to ḳhayāloñ meñ kabhī

raah chalte na milā din ke ujāloñ meñ kabhī

zindagī ham se to is darja taġhāful na barat

ham bhī shāmil the tire chāhne vāloñ meñ kabhī

jin kā ham aaj talak pā na sake koī javāb

ḳhud ko DhūñDā kiye un talḳh savāloñ meñ kabhī

thoḌī rusvā.ī tumhārī bhī to hogī yaaro

chhap ga.e sher hamāre jo risāloñ meñ kabhī

Leave a Comment