Kabhi Hai Aaj Aur Kal Kabhi Hai Bhala Ye Ahd-E-Visal Kya Hai

kabhi hai aaj aur kal kabhi hai bhala ye ahd-e-visal kya hai

ho va.ada iifa ki tark-e-ulfat ye roz-marra ki Taal kya hai

zaban bigḌi hai aap hi ki hamara nuqsan kya hai is men

zara tumhin puchhun dil se apne bhala ye tarz-e-maqal kya hai

jo manga ik bosa main ne un se to bole kya tu saḌi hua hai

zara ye baten suno to logo javab kya hai saval kya hai

unhen sar-e-rah akela pa kar ye bola chhati se main laga kar

ki ab to farma den banda-parvar visal men qil-o-qal kya hai

hain tark-e-ulfat men ham bhi raazi ye kah do be-khaTke us sanam se

buton ka is hind ki zamin par ḳhuda ki rahmat se kaal kya hai

kaḌa rakhe aadmi jo dil ko to jhel le har kaḌi ko asan

bandhi hui ho jo apni himmat to kaam koi muhal kya hai

ye kaisi hain ThanDi sansen ‘kaifi’ kahin to aaya hai aap ka dil

ye munh nikal aaya kyuun zara sa bata.iye to ki haal kya hai