Kabhi Kabhi Yun Bhi Humne Apne Ji Ko Bahlaya Hai

kabhi kabhi yuun bhi ham ne apne ji ko bahlaya hai

jin baton ko khud nahin samjhe auron ko samjhaya hai

ham se puchho izzat valon ki izzat ka haal kabhi

ham ne bhi ik shahr men rah kar thoda naam kamaya hai

us ko bhule barson guzre lekin aaj na jaane kyuun

angan men hanste bachchon ko be-karan dhamkaya hai

us basti se chhut kar yuun to har chehre ko yaad kiya

jis se thodi si an-ban thi vo aksar yaad aaya hai

koi mila to haath milaya kahin gae to baten kiin

ghar se bahar jab bhi nikle din bhar bojh uthaya hai

Leave a Comment