Ek Din KHud Ko Apne Pas biThaya Humne

Shariq Kaifi

ik din ḳhud ko apne paas biThaya ham ne

pahle yaar banaya phir samjhaya ham ne

ḳhud bhi aḳhir-kar unhi va.adon se bahle

jin se saari duniya ko bahlaya ham ne

bhiiḌ ne yunhi rahbar maan liya hai varna

apne alava kis ko ghar pahunchaya ham ne

maut ne saari raat hamari nabz TaToli

aisa marne ka mahaul banaya ham ne

ghar se nikle chauk ga.e phir park men baiThe

tanha.i ko jagah jagah bikhraya ham ne

in lamhon men kis ki shirkat kaisi shirkat

use bula kar apna kaam baḌhaya ham ne

duniya ke kachche rangon ka rona roya

phir duniya par apna rang jamaya ham ne

jab ‘shariq’ pahchan ga.e manzil ki haqiqat

phir raste ko raste bhar uljhaya ham ne