Ehsan Danish
kabhi kabhi jo vo ghurbat-kade men aa.e hain
mire bahe hue aansu jabin pe laa.e hain
na sarguzisht-e-safar puchh muḳhtasar ye hai
ki apne naqsh-e-qadam ham ne ḳhud miTa.e hain
nazar na toḌ saki ansuon ki chilman ko
vo roz agarche mire a.ine men aa.e hain
us ek sham.a se utre hain bam-o-dar ke libas
us ek lau ne baḌe phul-ban jala.e hain
ye dopahar ye zamin par lipa hua suraj
kahin daraḳht na divar-o-dar ke saa.e hain
kali kali men hai dharti ke duudh ki ḳhushbu
tamam phuul usi ek maan ke jaa.e hain
nazar ḳhalaon pe aur intizar be-va.ada
ba-in amal bhi vo ankhon men jhilmila.e hain
fusun-e-sher se ham us mah-e-gurezan ko
ḳhalaon se sar-e-kaghaz utaar laa.e hain
risala haath se rakhte na kyuun vo sharma kar
ghazal paḌhi hai to ham samne bhi aa.e hain
chale hain ḳhair se un ko pukarne ‘danish’
magar vo yuun to na a.enge aur na aa.e hain
Leave a Reply