Jyoti Azad Khatri
kabhi jalaya gaya to kabhi bujhaya gaya
tamam-umr charaghon ko azmaya gaya
abhi vo chand falak se utar ke aa.ega
ye ek ḳhvab hamen barha dikhaya gaya
kiya hai pyaas ka shikva jo asman se to
sulagti ret ka manzar hamen dikhaya gaya
to raaz khulne lage saare ḳhushbuon ki tarah
hava ko jab bhi yahan raz-dan banaya gaya
bujhe bujhe se the ashkon ke jugnu kal ki shab
tumhare zikr se ankhon ko jagmagaya gaya
vahin pe raqs bahut vahshaton ka tha ‘jyoti’
mohabbaton ka jazira jise bataya gaya
Leave a Reply