dil vo shai hai ki jo dekhe to khiche yaar ke saath
ye dukan vo hai ki chalti hai kharidar ke saath
ek dam-bhar ke liye ham na lagaya tha gale
umr hi kat gai qatil tiri talvar ke saath
tana-e-zulm-o-sitam laila-o-shirin pe abas
kya kiya aap ne ishq-e-dil-e-afgar ke saath
tegh chal nikli dam-e-qatl gale par mere
main ne tashbih jo di abru-e-khamdar ke saath
hashr aghyar ka shaddad ke hoga hamrah
jhuut kahta huun to bas hashr ho aghyar ke saath
na daren khuld men jaate hue jo rizvan se
us ke darvaze pe ruk jaaen khabar-dar ke saath
so gae bakht shab-e-vaada ye mujh se kah kar
kaun jaaga hai tire dida-e-bedar ke saath
is qadar charb-zabani nahin achchhi ai shama
bazm-e-janan men zaban katti hai guftar ke saath
hashr men zalim-o-mazlum juda honge daregh
haae vaan bhi na rahe us but-e-ayyar ke saath
haae afsos hai ‘salik’ ki javan-margi ka
ishq ki baat gai us jigar-afgar ke saath
Leave a Reply