Kabhi Bahaar Na Aai Bahaar Ki Surat

kabhi bahar na aai bahar ki surat

badal gai chaman-e-rozgar ki surat

hava-e-lutf-o-karam ke faqat sahare par

pade hain raah men gard-o-ghubar ki surat

vafa ki shakl na dekhi tumhare vaadon par

yahi zamane men hai eatibar ki surat

pas-e-fana miri qismat khuli vo rote hain

khud apne ghar men bana kar mazar ki surat

bagula dekh ke shukr-e-khuda vo kahte hain

nazar men phir gai ik khaksar ki surat

jidhar zamana phira main bhi saath saath phira

jo rang dekha vahi ikhtiyar ki surat

har ek baat pe chubhti hui jo kahta huun

tumhare dil men khatakta huun khaar ki surat

kisi ka bhes bharenge ‘sakha’ hain chalte hue

hazar ruup se dekhenge yaar ki surat

Leave a Comment