Hosh Tirmizi
kabhi aahen kabhi naale kabhi aansu nikle
un se aghaz-e-suḳhan ke ka.i pahlu nikle
yuun bhi vo bazm-e-tasavvur se guzar jaate hain
jaise lai saaz se ya phuul se ḳhushbu nikle
hai is ummid pe saiqal hunar-e-tesha-zani
sina-e-sang se shayad koi gul-ru nikle
qissa-e-dar-o-rasan hi sahi kuchh baat karo
kisi unvan se to zikr-e-qad-o-gesu nikle
gham-e-dauran ne kiya ahl-e-tamanna ka vo haal
dasht se jaise hirasan koi aahu nikle
ham jinhen ‘hosh’ tajahul se ḳhata samjhe the
navak-e-naz vo sab dil men tarazu nikle
Leave a Reply