kaaba o dair men hai kis ke liye dil jaata
yaar milta hai to pahlu hi men hai mil jaata
khidmat-e-yar men main jabki huun saail jaata
kuchh na kuchh bosa o dushnam se hai mil jaata
tere danton se jo hone ko muqabil jaata
surat-e-ashk guhar khaak men mil mil jaata
phal mila hai ye tiri tegh se ham ko ai turk
phuut ki tarah har ik zakhm hai khil khil jaata
rukh ke hote hue dhunda na dahan ka mazmun
sahal ko chhod ke kyuun janib-e-mushkil jaata
par to katre hain yaqin hai ki chhuri bhi phere
zamzamon se mire sayyad hai hil hil jaata
zakhm-e-kari ki tiri tegh se allah-ri khushi
raqs karta hua duniya se hai bismil jaata
raah bhule hue haaji hai bhatakta nahaq
kaabatullah jo jaata to su-e-dil jaata
tarfa rakhti hai kharabat-e-mughan kaifiyyat
hoshiyar aa ke hai is bazm se ghafil jaata
raah men shan-e-karimi hai tiri bhar deti
phir ke khali kisi dar se jo hai saail jaata
ai saba tu hi uda kar rukh-e-laila dikhla
dast-e-majnun nahin ta-parda-e-mahmil jaata
kaun si rahat-e-jan ki hain ye ankhen mushtaq
kar ke andher hai vo raunaq-e-mahfil jaata
amad-e-yar ki kanon se suni hai jo khabar
chhup ke pahlu se hai ankhon ki taraf dil jaata
Leave a Reply