Kab Tak Bhanwar Ke Bich Sahaara Mile Mujhe

kab tak bhañvar ke biich sahārā mile mujhe

tūfāñ ke ba.ad koī kinārā mile mujhe

jīvan meñ hādsoñ kī hī takrār kyuuñ rahe

lamha koī ḳhushī kā dobāra mile mujhe

bin chāhe merī raah meñ kyuuñ aa rahe haiñ log

jo chāhtī huuñ maiñ vo nazārā mile mujhe

saare jahāñ kī raushnī kab māñgtī huuñ maiñ

bas merī zindagī kā sitārā mile mujhe

duniyā meñ kaun hai jo ‘sadaf’ sukh sameT le

dekhā jise bhī dard kā maarā mile mujhe

Leave a Comment