Faragh Rohvi
navah-e-jan men kisi ke utarna chaha tha
ye jurm main ne bas ik baar karna chaha tha
jo but bana.unga tera to haath honge qalam
ye jante hue jurmana bharna chaha tha
baghair us ke bhi ab dekhiye main zinda huun
vo jis ke saath kabhi main ne marna chaha tha
shab-e-firaq ajal ki thi aarzu mujh ko
ye roz roz to main ne na marna chaha tha
kashid itr kiya ja raha hai ab mujh se
ki mushk ban ke faza men bikharna chaha tha
us ek baat pe naraz hain sabhi suraj
ki main ne un sa ufuq par ubharna chaha tha
laga raha hai jo sharten miri uḌanon par
mire paron ko usi ne katarna chaha tha
usi taraf hai zamana bhi aaj mahv-e-safar
‘faragh’ main ne jidhar se guzarna chaha tha
Leave a Reply