Shauq Ke KHwab-E-Pareshan Ki Hain Tafsiren Bahut

Ghulam Rabbani Taban

shauq ke ḳhvab-e-pareshan ki hain tafsiren bahut

daman-e-dil par ubhar aa.i hain tasviren bahut

doston ki bazm men kuchh soch kar lab si liye

varna daman-e-tasavvur men hain taqriren bahut

zindagi tere liye daftar kahan se la.iye

chand bosida varaq hain aur tahriren bahut

ḳhvahishen hi ḳhvahishen hain hasraten hi hasraten

dil sa divana salamat hai to zanjiren bahut

baat itni hai koi ho to sazavar-e-salib

is ga.e-guzre zamane men bhi ta.aziren bahut

zindagi ki talḳh tar sachcha.iyon ka kya ilaaj

yuun to ahl-e-maslahat karte hain tadbiren bahut

karobar-e-shauq ki hasil hain vo paspa.iyan

jin pe ‘taban’ naaz farmati hain taqdiren bahut