kab ek rang men duniya ka haal thahra hai
khushi ruki hai na koi malal thahra hai
tadap rahe hain pade roz o shab men uljhe log
nafas nafas koi pechida jaal thahra hai
khud apni fikr ugati hai vahm ke kante
ulajh ulajh ke mira har saval thahra hai
bas ik khandar mire andar jiye hi jaata hai
ajiib haal hai maazi men haal thahra hai
kabhi nahin tha na ab hai khayal-e-sud-o-ziyan
vahi to hoga jo apna maaal thahra hai
us ek baat ko guzre zamana biit gaya
magar dilon men abhi tak malal thahra hai
junun ke saae men ab ghar bana liya dil ne
chalo kahin to vo avara-hal thahra hai
bade kamal ka nikla vo aadmi ‘bilqis’
ki be-hunar hai magar ba-kamal thahra hai