Pinhaan
ai dil tiri barbadi ke asar bahut hain
shahkar ke bahrup men fankar bahut hain
na-vaqif-e-adab-e-mohabbat ko saza kya
ai husn-e-azal tere ḳhata-kar bahut hain
yadon ki baharen bhi hain virana-e-dil men
is dasht-e-bayaban men ye gulzar bahut hain
ye vaqt ki sazish hai ki suraj ki shararat
saa.e miri divar ke us paar bahut hain
dil ḳhud jo nahin rakhte hain vo lete bhi nahin dil
ḳhuddar ziyada hain jo nadar bahut hain
jiine ke liye dil men jagah chahiye varna
marna hai to phir bas dar-o-divar bahut hain
bas ḳhair ki ho ḳhair dua aao ye mangen
lagta hai ki ab shar ke taraf-dar bahut hain
ḳhud se bhi to milne ki ijazat nahin dete
hasti ke haqa.eq jo pur-asrar bahut hain
jiine bhi nahin dete hain marne bhi na denge
kuchh mere savalat jo be-kar bahut hain
divan pe divan bhi kam hote hain ‘pinhan’
ash.ar jo dil chhu len vo do chaar bahut hain
Leave a Reply