fughan-e-ruh koi kis tarah suna.e use
ki zaḳhm zaḳhm badan to nazar na aa.e use
na dekhne ki saza-var jis ko aankh hui
koi piyasa bhala haath kya laga.e use
surur lazzat-e-hasil ka kuchh siva hoga
chalan ata ka agar ḳhusravana aa.e use
mire lahu men utar a.enge na.e mausam
chuni hai dil men jo divar si vo Dhaa.e use
khula na us pe kabhi meri aankh ka manzar
jami hai aankh men kaa.i koi dikha.e use
vo raushni ka havala vo rang-o-bu ka safir
mari jamal-pasandi kahin se laa.e use
farogh-e-husn shaguft-e-gul o ram-e-shabnam
fareb kaise ye ‘shahid’ koi sujha.e use
Leave a Reply