Kaam Aa Sakin Na Apni Wafaen To Kya Karen

kaam aa sakin na apni vafaen to kya karen

us bevafa ko bhuul na jaaen to kya karen

mujh ko ye e’tiraf duaon men hai asar

jaaen na arsh par jo duaen to kya karen

ik din ki baat ho to use bhuul jaaen ham

nazil hon dil pe roz balaen to kya karen

zulmat-ba-dosh hai miri dua-e-ashiqi

taron ki mishale na churaen to kya karen

shab bhar to un ki yaad men taare gina kiye

taare se din ko bhi nazar aaen to kya karen

ahd-e-tarab ki yaad men roya kiye bahut

ab muskura ke bhuul na jaaen to kya karen

ab ji men hai ki un ko bhula kar hi dekh len

vo baar baar yaad jo aaen to kya karen

vaade ke e’tibar men taskin-e-dil to hai

ab phir vahi fareb na khaen to kya karen

tark-e-vafa bhi jurm-e-mohabbat sahi magar

milne lagen vafa ki sazaen to kya karen

Leave a Comment