justuju rahrav-e-ulfat ki jo kamil ho jaa.e
shauq-e-manzil hi charagh-e-rah-e-manzil ho jaa.e
haa.e ye josh-e-tamanna ye nigun-sari-e-ishq
vo jo aise men chale aa.en to mushkil ho jaa.e
justuju shart hai manzil nahin mashrut-e-talab
gum ho is tarah ki gard-e-rah-e-manzil ho jaa.e
vasl ka ḳhvab kuja lazzat-e-didar kuja
hai ghanimat jo tira dard bhi hasil ho jaa.e
zabt bhi sabr bhi imkan men sab kuchh hai magar
pahle kambaḳht mira dil to mira dil ho jaa.e
aah us ashiq-e-nashad ka jiina ai dost
jis ko marna bhi tire ishq men mushkil ho jaa.e
kamran hai vo mohabbat jo bane ruh-e-gudaz
dard-e-dil had se guzar jaa.e to ḳhud dil ho jaa.e
mahfil-e-dost men chalta to huun ai dida-e-shauq
ishq ka raaz na afsana-e-mahfil ho jaa.e
qabil-e-rashk bane zindagi-e-ishq us ki
jis ki tu zindagi-e-ishq ka hasil ho jaa.e
apne ‘ehsan’ ko tu hi koi tadbir bata
jis se ye nang-e-mohabbat tire qabil ho jaa.e
Leave a Reply