Akhlaque Bandvi
justuju ne tiri har chand thaka rakkha hai
phir bhi kya gham ki isi men to maza rakkha hai
kuchh to apni bhi tabi.at hai gurezan un se
kuchh mizaj un ka bhi bar-dosh-e-hava rakkha hai
kya tujhe ilm nahin teri raza ki ḳhatir
main ne kis kis ko zamane men ḳhafa rakkha hai
jab nazar uTThi ruḳh-e-yar pe ja kar Thahri
jaise ankhon men koi qibla-numa rakkha hai
kaun huun kya huun kahan huun mujhe malum nahin
zindagi tu ne ye kis moḌ pe la rakkha hai
naam ka aks bhi aina-e-kirdar men rakh
naam ‘aḳhlaq’ sahi naam men kya rakkha hai
Leave a Reply