junun ka koi fasana to haath aane do
main ro paḌunga bahana to haath aane do
main apni zaat ke raushan karunga virane
qubuliyat ka zamana to haath aane do
main ruup aur sanvarunga dastanon ke
kisi ka qissa purana to haath aane do
miri nazar men zamane ki kaj-ada.i hai
nishan bahut hain nishana to haath aane do
ḳharid lunga main duniya zamir ki ‘sahil’
zara ruko ye ḳhazana to haath aane do
Leave a Reply