Shaista Sahar
junun-e-ishq ki amadgi ne kuchh na diya
yahan bhi ziist ki uftadgi ne kuchh na diya
lahu ki mauj se bam-e-ḳhayal raushan hai
damakte chand ki ustadgi ne kuchh na diya
ye lab tumhare nahin kar sake masiha.i
unhen bhi vaqfa-e-vamandgi ne kuchh na diya
sameT laa.e the jitne bhi ḳhvab the lekin
huzur-e-dost bhi divangi ne kuchh na diya
main dekhti thi tire ḳhal-o-ḳhad ko hairat se
magar ye kya ki miri sadgi ne kuchh na diya
tumhari jeb bhi ḳhali tumhare dil ki tarah
tumhen bhi fursat-e-yak-bargi ne kuchh na diya
diye ke nuur men karte rahe safar saare
vo jin ko nisbat-e-sayyargi ne kuchh na diya
bhaTak rahe hain kisi ajnabi masafat men
mah-o-nujum ko avargi ne kuchh na diya
vo log kaun hain jin ko ḳhuda nasib hua
hamen to dil tiri nazzargi ne kuchh na diya
ye aankh aaj bhi dar par lagi hui hai ‘sahar’
tamam umr ki bechargi ne kuchh na diya
Leave a Reply