Ahmad Husain Mail
jumbish men zulf-e-pur-shikan ek is taraf ek us taraf
gardish men chashm-e-sehr-e-fan ek is taraf ek us taraf
aariz pe zulf-e-pur-shikan ek is taraf ek us taraf
hain aaj do suraj-gahan ek is taraf ek us taraf
matlab isharon se kaha main in isharon ke fida
ankhen bhi hain garm-e-sukhan ek is taraf ek us taraf
jis dam sikandar mar gaya hal-e-tahi-dasti khula
the haath bairun-e-kafan ek is taraf ek us taraf
jaega do ho kar ye dil aadha idhar aadha udhar
khinchegi zulf-e-pur-shikan ek is taraf ek us taraf
ghairon se khel khelo na tum kar denge rusva hashr men
hain do farishte jan-e-man ek is taraf ek us taraf
aariz pe simte khud-ba-khud zulfon ke ghungar vaale baal
hai nafa-e-mushk-e-khutan ek is taraf ek us taraf
shirin ka khvahan hashr men khusrav bhi hai farhad bhi
khinchenge donon pairahan ek is taraf ek us taraf
ghungat jo galon se utha tar-e-nazara jal gaya
suraj the do jalva-figan ek is taraf ek us taraf
qatil idhar jarrah udhar main nim-bismil khaak par
ik tir-e-kash ik tir-e-zan ek is taraf ek us taraf
ankhon ke andar jaae ghair ankhon ke uupar hai naqab
khalvat men hain do anjuman ek is taraf ek us taraf
vo hatha-pai ham ne ki bistar pe tuute aur gire
baazu ke donon nau-ratan ek is taraf ek us taraf
pesh-e-khuda roz-e-jaza main bhi huun chup qatil bhi chup
goya khade hain be-dahan ek is taraf ek us taraf
rukhsar par khat ka nishan gul par hua sabza ayaan
hain donon aariz do chaman ek is taraf ek us taraf
kafir bhi huun momin bhi huun jalna bhi hai gadna bhi hai
khinchenge shaikh-o-barahman ek is taraf ek us taraf
ghabra na jaaen dil-jigar hai band turbat men hava
pankhe hon do nazd-e-kafan ek is taraf ek us taraf
yarab uthun jab qabr se do but rahen ham-rah mire
gharat-gar-e-hindu-o-dakan ek is taraf ek us taraf
kahte hain anmol us ko sab kahte hain kuchh gol us ko sab
kya chiiz hai ai jan-e-man ek is taraf ek us taraf
jannat ki huren aaiin hain ‘mail’ dabane mere paanv
baithi hain nazdik-e-kafan ek is taraf ek us taraf
Leave a Reply