Bashir Badr
vahi taaj hai vahi taḳht hai vahi zahr hai vahi jaam hai
ye vahi ḳhuda ki zamin hai ye vahi buton ka nizam hai
baḌe shauq se mira ghar jala koi aanch tujh pe na aa.egi
ye zaban kisi ne ḳharid li ye qalam kisi ka ghulam hai
yahan ek bachche ke ḳhuun se jo likha hua hai use paḌhen
tira kirtan abhi paap hai abhi mera sajda haram hai
main ye manta huun mire diye tiri andhiyon ne bujha diye
magar ek jugnu havaon men abhi raushni ka imaam hai
mire fikr-o-fan tiri anjuman na uruuj tha na zaval hai
mire lab pe tera hi naam tha mire lab pe tera hi naam hai
Leave a Reply