shab ke ḳhilaf barsar-e-paikar kab hue
ham log raushni ke talabgar kab hue
ḳhushbu ki ghaat men hain shikari havaon ke
jhonke magar kisi se giraftar kab hue
ta.abir ki ruton ne badan zard kar diye
phir bhi ye log ḳhvab se bedar kab hue
taale laga liye hain ḳhud apni zaban par
kya baat hai tum itne samajhdar kab hue
ye ahd apni ruuh men ahd-e-firaq hai
ham matl.a-e-suḳhan pe numudar kab hue
ḳhil.at vasul karte hue sar uTha liya
rusva ‘najib’ ham sar-e-darbar kab hue
Leave a Reply