Jo Tum Pe Yunhi luTai Maine Ab Uski Qimat to Chahiye Na

Shahnawaz Ansari

jo tum pe yunhi luTa.i main ne ab us ki qimat to chahiye na

tumhari nazron men hai mohabbat agar tijarat to chahiye na

jo mujh se milne ki ḳhvahishen hon to ek lamha tavil kar lo

masafaton ko sameTna hai zara si muddat to chahiye na

tumhare lahje men tanz hai par suno kuchh is men maza nahin hai

tum is ko thoḌa sa talḳh kar lo zara si lazzat to chahiye na

main chahta huun ki aks tera miri nazar se bhi ho ke guzre

ye dil jo ḳhali dhaḌak raha hai ab is men hasrat to chahiye na

mujhe vo kuchh aise dekhti hai ki jaise mujh ko bula rahi ho

main us ki janib qadam baḌha luun magar ijazat to chahiye na

main ashk saare sukha ke apni udasiyan bhi tabah kar luun

magar mujhe in tabahiyon ki koi zamanat to chahiye na