Jaleel Hashmi
jo teri afshan sanvaren zindagi ai zindagi
roz-o-shab aise guzaren zindagi ai zindagi
baḌh gaya dariya ka paani kaf uḌata mauj mauj
uḌ ga.iin kunjon ki Daren zindagi ai zindagi
har taraf chhaya hua hai ik sukut-e-bekaran
phir bhi ham tujh ko pukaren zindagi ai zindagi
teri surat par guman-e-dasht-o-sahra haa.e haa.e
tere qadmon men baharen zindagi ai zindagi
sar uTha.en daar par yaden sar-e-maqtal sada
naqsh tere hi ubharen zindagi ai zindagi
jin ke honTon par sada rahte hain tere zamzame
un ke sinon men kaTaren zindagi ai zindagi
shahr hai aḳhir ye koi sard virana nahin
jiine vaale dam na maren zindagi ai zindagi
den jo tujh ko fursat yak do nafas ki tohmaten
un se bhi ham log haren zindagi ai zindagi
duur tak milta na ho nam-o-nishan tera jahan
ham vahan daman pasaren zindagi ai zindagi
Leave a Reply